अहिले राजधानीमा

अहिले राजधानीमा


मोटरको पेटमा किराझैँ
क्यान्ड फुड भै सडक टार्दै
आँखाबाट फुटपाथमा
कचेरे झ्यालहरुबाट मट्याङ्ग्रा फ्याँक्दै आफैँलाई
श्वासश्वासको सजगता
हाम्रो तपस्या हो ।

अँध्यारो कम्मल फ्याँकेर सूर्यले

अलिकति शीतमा काँप्दै बार्दलीमा चिप्लिँदा

रातभर गर्मीका डाम छालामा उमारेर

बट्टेकोठाहरुमा अण्डा फुटेका निद्राहरु

भोलिहरुका पहिरन ।

डाँडा छेकिने डाँडाभन्दा अग्ला घर

धमिरे भोकबीच खालीखाली

एकदुई ईँट झरेका खट्प्वाले दन्तलहर

तिरस्कृत ग्रेगर टोकी सिरिङ्ङ

मनभरी झंकृत सपना

चन्द्रमालाई पुछिजाने बादलझैँ

पखालिएका भाकाले नजोडिइ उम्किरहेका

भावनाका पिण्डहरु, भोक र प्यासमा आँख्ला भाँचिएर

नाता गाँस्ने झुण्डहरुको शान्तिपर्व

फक्रिँदै गमलाभरी करेसा

हिउँबाट पग्लेका, फाँटबाट अग्लेका

समुद्रैतिर हान्निएका, च्याङ्लो सीमानाले

रत्तिभर नछानिएका, वगालवगाल बगेका

बाढी भै विचार मेटाउने बीरबलहरु

ठट्टामा छौँ ।