सहानुभूतिविनै रोइरहेको छु

म सहानुभूतिविनै रोइरहेको छु
क्यामेरा लिइ खिच्नेहरु
फोटोजेनिक छ भन्दैछन्
घारबाट मह रसाएजस्तो,
मलाई चाहिँ न त पोल्छ आँखा
न चहर्‍याउँछ गाला,
केवल नाकका प्वालमा आइ झुण्डेका थोपाले
तर्साउँछन् आसन बिगार्नेगरी हाच्छिउँ गराइदिने
सोच्दैछु, हाच्छिउँ गरिदिउँ त भन्दिनेछु—
यो कस्तो लाग्यो ‘पिक्चर इन मोसन’ ?

तर म हाँच्छिउँ निषेधित स्टुडियोमा
 सहानुभूतिबिनै रोइरहेछु,
रित्तो मौनता बिक्ने महंगो व्यापारको
विनम्र नोकर भइ ओठ टोकिरहेछु,
‘पर्फेक्ट’ चित्र तयार नहोउञ्जेल
त्वचाका हरेक शूक्ष्म दुलाबाट उम्किन सक्ने
पसिनाका भ्रुणहत्या गरिरहेछु,
शेयर बजारको ढलपल गर्दो सूचक जसरी
‘सर्किट ब्रेकर’ कतिबेला चल्ला कुरिरहेछु ।

२०७२ चैत्र २०